Da Glaube prägt, des is nix neis. Egal ob des da Glam an Gerechtigkeit, da Gottesglaube, da Glam an a bessane Zukunft oder oafach da Glam im Recht zum sei, is. “Glabts doch wos megts” nimmt ma ja ned umsunst oft her, wenn a Situation eskaliert und ma einfach sei Rua hom mecht. Meistens is oam dann äh scho wurscht wias ausgäd…
“Glabts doch wos megts” kannt aber ah a guada Rat für unsa Zukunft sei. Den andan glam lossn, wos er mog, zoagt doch a a guads Stückl, dass ma si säiba Zamreißn konn. Dem Andam agrad ned zum sogn, wos er jetzad deina Ansicht noch glam muas oder soid is doch da Kern vo olle Religionen auf dera Wäid. Wenn si hoid nachad a olle dro hoidn dadn.
I bin katholisch geborn woan, i bin daft woan, hob Kommunion in Feching und Firmung in Hoizkirch ghabt. Ois Kind oder Jugendlicher gfreid ma si üba de Festl und dass ma do an tollen Ausflug macha konn. Do denkt ma ned weida drüba noch. Aber i hob ma spada numoi Gedanken drüba gmacht.
Und oans war für mi dann ganz klar: I bin ah überzeugter Christ und des binne gern und mit Herzblut. Koa bissl ned, weils hoid “IN” is in Bayern oda weil ma ja irgendwia olle Katholisch san und des da oafachste Weg is. Na i bins gern, weil i mi damit identifizieren konn. Da Kern vom christlichen Glam is guad, er kannt häifa unsa Wäid positiver zu gestalten.
Nia warads oafacha “Nicht-Kirchensteuer-Zahler” zum sei. Nia wars oafacha zum sogn, na mit da Kirch, des is ma ois politischer Amtsbewerber zu hoaß, do kannt jetz da oa oder andere anders entscheiden, weil er mit dem nix zum doa hom wui.
ABER es is eben ned so, dass ma einzelne Taten auf a ganze Gruppen, auf ganze Bevölkerungen übertrogn derf. Und wemma ehrlich is, in welchem Bereich, in welcher Berufsgruppe oder welchem Verein gibt de ned, de OANZELNA, de über die Stränge schlogn. Schlimm is nur, wenn ma durch Oanzelne ANDERE über an Kamm schert und verurteilt.
Deswegn is mia ganz wichtig a Politik zum lem, de am Schubladendenken an Garaus macht.
Und samma moi ehrlich, bereits getroffene Entscheidungen zoang, wia bei da Bonpflicht, dass foisch is, wemma a ganze Gruppen hart arbanda Leid und den “Generalverdacht auf Steuerbetrug” stäid.